نبذة عني

الاسم: سارة محمد سيف

مواليد: نوفمبر 1995

العمر: 20 سنة

الكلية: كلية طب بيطري جامعة القاهرة

رواياتي:  
أنا وأنتِ يساوي، كوخ بآخر المدينة، أصدقائي قنبلة ذرية، رزقت الحلال

حلمي: 
عندي أحلام كتير .. فيها المتعلق بالكتابة واللي لا، منها أحلام لبيتي وأحلام خاصة بمجال دراستي وأكيد هوايتي واللي هي الكتابة .. حلمي الخاص بالهواية، إني فلا أوصل للناس، أحقق اسم له مكانته بين الكتَّاب، أفيد الناس وأوضح وجهات نظر وزوايا تانية من الدنيا، وإن الدين والحياة وجهان لعملة واحدة .. ماينفعش أعيش الحياة بدون الدينا وأوصل للراحة والهدوء النفسي .. وما ينفعش اعتمد على الدين وبس من غير الحياة لان مهمتنا في الحياة هي إعمار الأرض وإلا كنا اتخلقنا ملائكة مش بشر ...
حققته ؟
-لسه، بس أنا فـ الطريق إليه، وبعون الله هأوصله 

الصعوبات اللي قابلتني ؟
-كتيــــــر، فــ رأيي أكبر صعوبة قابلتها إني اتقبل أراء الناس اللي بتقول وجهة نظرها بشكل جارح :3 ، لا وممكن ف الآخر يبقى نقد لمجرد النقد مش عشان أبقى أحسن، أو لأنهم شايفين فيا موهبة ومستقبل 

بدايتي ؟
- بدأت من سنة ونص تقريبا ^^، ماكنتش حاطه ف دماغي الكتابة ولا فكرت قبل كدا إني ممكن ألقب بكاتبة .. زيي زي بنات وناس كتير، باخلص من سنة دراسية وادخل ف اللي بعدها .. ومن مرحلة للتانية .. لكن بعد ما دخلت الجامعة حسيت ان الدنيا وسعت مني فجأة وبقت كبيرة عليا، المواد كتير وتقيلة لا وكمان كلها إنجليزي .. وأنا ما باحبش اللغة دي .. مافيش بيني وبينها عمار.. ماكنتش عارفه اذاكر خصوصا اول فترة بتحتاج حفظ مصطلحات وتعبيرات طبية وفجأة لاقتني مش قادرة احفظ حاجه .. وبالصدفة بعد فترة شوفت دكتور بيتكلم فـ التلفزيون وقال ضعف الذاكرة والقدرة ع الحفظ والتركيز بيرجع لان الدماغ مشغولة بأفكار تانية .. في ناس عندها المخ نشيط جدا أحيانا في التفكير وأحيانا في الخيال وعشان تتخلص م الحالة دي وتقدر ترجع تحفظ زي الأول لازم تكتب اللي ف دماغك وتفضيه على ورق، قررت أجرب .. مش هاخسر حاجه، فعلا بدأت اكتب وارتاح، مش بس كدا لا الأفكار كمان بدأت تتجدد وخيالي ينشط ويجيب افكار جديدة .. كنت باقرأ قصص وروايات من صغري فدماغي خيالها عالي .. لدرجة اني كنت باتخيل احداث ساعات تتصادف وتشبه اللي حصلت ف الرواية فعلا وساعات بتختلف شوية او تماما.. المهم بقيت افضي اللي فدماغي على شكل رواية .. صحابي عرفوا وشجعوني انزلها حلقات ع الفيس .. عشان مش متعودين ع القراية ورواية كاملة كتير عليهم مرة واحدة .. عملت صفحة ع الفيس .. وعملت دعوة لصحابي وهما عملوا لصحابهم .. عجبتهم وكذا حد تاني واتحولت لكتاب الكتروني ونزلت وبدأت اكتب كمان وكمان وفجأة لاقيتهم بيقولوا عليا كاتبة ههههه

نصيحة للبنات ؟
-دوري ع الحاجه اللي تلاقي نفسك فيها، اعمليها مادام مافيهاش حرمانية من ربنا أو رسوله نهى عنها ^^، شجعي نفسك وما تستنيش تشجيع من حد، بابا اول ما عرف إني باكتب سألني هي كام صفحة ؟ .. قولتله 134 (قبل التنسيق على الـ word) راح فتح بؤه وقالي: كتبتي كل دا ؟ .. ولحد دلوقتي ما قرأليش حاجه وماما قالتلي اكتبي مادام مش هيأثر على دراستك وقرأت تالت رواية كتبتها (أصدقائي قنبلة ذرية) عشان اتطبعت منها نسخة واحده .. ف الأول ما حبتش تحبطني فقالتلي اكتبي بس هي بتقرأ من زمان لأمخاخ يعني مش أي كلام .. فما حبتش تصدمني بكلامها أو تقول كلمه تضايقني وسابتني .. لكن لما قرأتلي بعد 3 رواية .. كانت بتبصلي باستغراب كتير .. مش مصدقة إن بنتها بالدماغ دي .. قالتلي: "تفكيرك حلو جدا، بتحلي المشاكل بطريقة سهلة وفعالة، ما تخيلتش إن ممكن يطلع منك دا، كملي"، كان اعتراضها الوحيد على الاخطاء الاملائية .. ودا عيب اعترف بيه حتى الآن وباحاول اعدله على قد ما أقدر :3 .. من الآخر ماحدش هيعترف بيكي غير لما توصلي يشوفوكي فـــــــــــــوق .. ع القمة.
ما تفتكريش إنك لما توصلي هيبقى الطريق سهل، لا كل ما تقربي الصعوبات بتكتر، يعني حطي ف بالك اللي هيقف فـ طريقك لو كان 100% عقبال ما توصلي هيبقى 10000% .. مش بأقفلها فـ وش حد لكن كل ما الصعوبات بتزيد التحدي بيعلى ومتعة الوصول بتبقى أحلى وأطعم
ركزي على حلمك وطوري نفسك فيه، اعرفي مقوماته وعيوبه ومزاياه قبل ما تبدأي تدخلي فيه، لما تتأكدي إنك قد كل اللي فات ابدأي بقى عشان توصلي لحلمك، مهند أبو دية لو تسمعوا عنه .. دا مخترع سعودي، كان ف دماغه اختراع لغوصة بدون ذكر تفاصيل .. سمع كلمة مستحيل 232 مرة فــ 4 سنين .. كانوا بيقولوا له مستحيل تحقق اللي فــ دماغك .. لكن حققه فــ النهاية.. الباشمهندس مهند أعمى .. ومبتوره رجله اليمين.. وقدر يحقق 

دا عبارة عن حوار مع حواء